ၸႂ်ၵူဝ်သမ်ႉဢမ်ႇၸႂ်ႈၸိူင်ႉၼၼ် လွင်ႈၶူင်သၢင်ႈဢွၵ်ႇလွင်ႈလီ လႄႈတၢင်းတုမ်ႉယွၼ်ႈလွင်ႈလုသုမ်း ၵေႃႈ ဢမ်ႇၼႄဢွၵ်ႇ။ ၵူၺ်းၵႃႈမၼ်းမေႃႁဵတ်းႁႂ်ႈၺၢၼ်ႇၼမ်ႉၵတ်ႉတၢင်းၶႅၼ်ႇ ဢၼ်မေႃၶူင်သၢင်ႈ ၼမ်းၼႃႈ ၼၼ်ႉ လုသုမ်းသေ ႁႂ်ႈပဵၼ်ၽူႈတမ်ႇယေႃႈ ၺၢမ်ႉၶုၺ်ႈ ၵူဝ်ႁႄ ထွမ်ႇၶေႃႈပူင်ပိူၼ်ႈလုမ်းလုမ်း ၼၼ်ႉ ၵူၺ်း ယဝ်ႉ။
ၸႂ်ၸၢၼ်ႈၸင်းၼႆႉယင်းၸၢင်ႈမေႃပဵၼ်လွင်ႈၶီႈၵႄႉတေႃႇၵေႃႉၶႄႉၶဵင်ႇႁဝ်းၼၼ်ႉသေ ဢွၵ်ႇၸႂ်ဢမ်ႇၶႂ်ႈ ၶၢမ်ႇယဝ်ႉၶိုၼ်းၸိုၼ်ႇၶတ်းၸႂ်ၶႄႉႁႂ်ႈပူၼ်ႉဢွင်ႇမၢၼ်ၶိုၼ်ႈယႂ်ႇၵႂႃႇၵေႃႈမီး။ လွင်ႈၶီႇၼဵၵ်း တဵၵ်းတဵင်ၼိူဝ် ၵၼ်လႄႈဢမ်ႇတြႃးသေပေႉပုၼ်ႈၼိူဝ်ၵၼ်ၸိူဝ်းၼႆႉၵေႃႈယင်းမေႃဢဝ်တေႃးသတွပ်ႇတိုၵ်းၶိုၼ်းယဝ်ႉ။ၸႂ်ၵူဝ်သမ်ႉ ၵူၺ်းမေႃပၼ်ၸႂ်ဢၼ်ယုမ်ႇယမ်တူဝ်ၵဝ်ႇ၊ ၸႂ်ဢၼ်မေႃဝႆႉၵႃႈၶၼ်တူဝ်ၵဝ်ႇ ၸိူဝ်းၼၼ်ႉ ၶုၺ်ႈသေၶုၺ်ႈၵႂႃႇယိုၼ်းယၢဝ်းၶၢဝ်းႁီးၼၼ်ႉတိၵ်းတိၵ်းၵူၺ်းယဝ်ႉ။
တႃႇတေပဵၼ်မႃးၵူၼ်းသၼ်ႈပၢႆးတူဝ်ပၢႆးၸႂ်ယူႇလီ ၶိူင်ႇၶမ်ႉ မၼ်ႈၵႅၼ်ႇ၊ မေႃပွင်ႇၸႂ်လွင်ႈတၢင်းႁူႉလွင်ႈ တၢင်းႁၼ်ၼႂ်းတူင်ႇဝူင်းၵူၼ်း၊ မီးၸႂ်ႁတ်းႁၢၼ်တဵမ်ထူၼ်ႈလႄႈ မီးတၢင်းယုမ်ႇယမ်တူဝ်ၵဝ်ႇၼႂ်းၸၢတ်ႈ ပၢၼ်ၵူႈမိုဝ်ႉၵူႈဝၼ်းၼၼ်ႉလီလႆႈၸိုၼ်ႇပိုၵ်ႉၽိုၵ်း လဵင်ႉဢွၵ်ႇၸႂ်ႁတ်းႁၢၼ်ယူႇယဝ်ႉ။
ၵဵပ်းထွၼ်ဢဝ်မႃးတီႈ သၢႆပႅၼ်း မၢႆ 11 ၽူႈတႅမ်ႈ လႅင်းသိမ်ႇ (သႅၼ်ႁူဝ်)
No comments:
Post a Comment